دار الوسط اليوم للاعلام و النشر
الإثنين 10/3/1440 هـ الموافق 19/11/2018 م الساعه (القدس) (غرينتش)
باسم يوسف يفسر أسباب تجاهله نعي أحمد زويل: «أنا مش صفحة وفيات»
باسم يوسف يفسر أسباب تجاهله نعي أحمد زويل: «أنا مش صفحة وفيات»

نشر الإعلامي باسم يوسف على صفحته الشخصية على موقع التغريدات «تويتر»، ردًا من جانبه على التعليقات من جمهوره التي انتقدت تجاهله نعي العالم أحمد زويل، على حساباته على مواقع التواصل الاجتماعي.

وعلق «يوسف» قائلًا: «أنا مش نشرة أخبار، مش وكالة أنباء ومش صفحة وفيات، أنا مش مُطالب إني أعلق على أي أحداث أنت شايف المفروض إني أعلق عليها من أول نزاع في بلد معين لانقلاب في بلد تاني لوفاة حد في بلد تالتة، ولو حصل وعلقت فده لأَنِّي بمارس نفس الحرية اللي أنت بتديها لنفسك، إنك تتكلم على إيه وماتتكلمش على إيه، العيال الرخمة بتاعة ما اترحمتش على فلان ليه هما نفسهم اللي لو قلت فلان ربنا يرحمه حيخشوا يقولوا طب وما اتكلمتش على فلان أو علان أو ما جبتش سيرة ترتان ليه».

وتابع: «نفس الناس اللي تقولك ما علقتش على أحداث معينة ليه ولو علقت يقولك طب ما اتكلمتش على الحدث التاني ليه، العالم مش مستني ستاتوس الفيس بوك عندي أو عندك عشان يتصرف على حسب حنكتب إيه، إحنا كلنا أتفه من كده، والملائكة مش واقفة على حساب تويتر تشوف مين اللي اترحم على مين ومين لا، و أبواب السما أو الجحيم مش مستينة عدد اللايكات والشير عشان تقرر تفتح لمين وتقفلها في وش مين، الحياة والموت والترحم كانوا موجودين قبل الفيس بوك وتويتر والإنترنت شخصيًا، الحياة الأخرى مش واقفة على التويتة بتاعتك».

وعلق عليه متابعوه بأرائهم، فقال حساب يحمل اسم «هند فاروق»: «إنك تترحم عليه لا هتزوده ولا هتنقصه أنت حر، الناس اللي فيها الخير كفت ووفت»، وعلق حساب يحمل اسم «أحمد عثمان»: «تويته فيها تكبر مشفنهوش فيك قبل كده»، وقال حساب يحمل اسم «شادي محمد»: «أول مرة أشوف فيك تكبر، الجمهور اللي عملك من حقة عليك إنك تستحملة ومتهاجمش الناس بالطريقة دى، أنت شخصية عامة ودة لية مميزات زى الفلوس والشهرة، ولية عيوب زى أنك ملك للناس الى عملتك وتصرفاتك بتتأخد عليك».