دار الوسط اليوم للاعلام و النشر
الجمعة 3/1/1440 هـ الموافق 14/09/2018 م الساعه (القدس) (غرينتش)
قمت من النوم مخطوف (زجل مغربي)....كمال ازنيدر

قمت من النوم مخطوف
شداني الرعادة والخوف
حلمت حلم ماشي مألوف
حلم كلو جناوة وسيوف.

كانت الفرحة عامة القبيلة
حفلة كلها موسيقى وتبوريدة
منشطاها الشيخة الحاجة زوبيدة
ديك الشيخة الزوينة الغليظة.

شيخ القبيلة كيغني ويشطح
ومقدم الحومة، بالضحك مفرطح
الوالي جالس مفييك مفطح
واكل شعب، دافع جبهة ومسنطح.

شي داخل خارج، شي طالع هابط
وشي دايخ كويلة، من الشرب فارط
شي نسى همومو وبالفرحة باسط
وشي على تبدير اموال القبيلة ساخط.

على غنا الطبالة وتبوريدة الخيالة
الشباب ثارو ونوضوها قربالة
شعلو العافية فالخيمة والنوالة
دوروها قرطاس، خلقو البلبالة.

ثارو ضد المنكر، ثارو ضد الفساد
ثارو ضد السيبة اللي عمت البلاد
قالو لا للظلم وللتفلية على العباد
واللي زرع الشوك، الليلة يذوق الحصاد​.

2018-04-07