بحبِك يا مصر يا بلدى
أفديكى بالروح وبولدى
والعزة هيه راسمالى
وارثها عن أبويا وجدى
بحبك مش بس كلام
داحبك فى القلب غرام
بيسرى ف عروقى ودمى
يا بلدى يا أم الأَعلام
بحبك من غير أحزاب
بحبك عواجيز وشباب
بحبك و بكل ما فيكى
بالفطرة من غير أسباب
بحبك وبحب ترابك
وهفضل واقف على بابك
أنا جندك ليلى ونهارى
بحميكى واحرس أعتابك
بحبك شايف أشغالى
مقلتش مرة وانا مالى
شاكر لله متواضع
هادى ومنيش متعالى
بحبك من غير عصبية
وانتى ف عيونى صبية
وغيرتى يا بلادى عليكى
غيرة العاشق لبهية
بحبك وبقدر ناسك
اللاهى منهم والناسك
وبادعى ربنا يهدينا
نزرع أرضك وبفاسك
بحبك حِلى وترحالى
يا نجمة ف السما بتلالى
بحبك فرحان وحزين
بحبك ف جميع أحوالى
بحبك بآراء مختلفة
بحبك بقلوب مؤتلفة
بحبك بالفكر الراقى
نبنى بإيدين محترفة
بحبك وياريت نتعلم
وبسرعة قبل مانتألم
نعيش كلنا فى محبة
وبلاش للفرقة نسلم. ....
