الخميس 16/10/1440 هـ الموافق 20/06/2019 م الساعه (القدس) (غرينتش)
قصيدة شعر عامية بعنوان : القمر صحاني....محمد السيد طه

بعنوان :- القمر صحاني

**************

في ليله وفي عز نومي

قام القمر صحاني

عايزني قال إيه

أعصر أفكاري

وأكتب قصيدة جديدة

في دفتر أشعاري
 

قالي أنا شايفك

بقيت كسلان

وحبيبة القلب
نسيتها كمان

وزهرة روحك

بقت من الزهر الدبلان

قلتلة ياعم

إنت مالك ومالي

أنا ما بصدق عيني تنام

وأهرب من واقعي للأحلام
 

الواقع ده سجان

ساجن أحلامي

بين أربع جدران

واسطة

ومحسوبية

ومعرفة

وقرابة كمان
 

أنا المظلوم

صوتي مسجون

بين قضبان ضلوعي

وقاضي قاعد

بيحكم بإعدام صوتي

وقلبي

واقف محامي دفاع

بيترافع بأن

أحلامي لغيري بتتباع
 

هل القمر بالبكا

من ضية على حالي
 

وقالي أنا أسف

صحيتك للأوجاع

بس نصيحة مني
قبل لما أمشي

ما تستسلمش  للأحلام

وأستأذنك أنا بقى
وأسيبك أنت تنام



*****************
 

بقلم

 الشاعر / محمد السيد طه

 " شاعر العامية "

---.---.---.---.---.---.---

البشمدرس محمد

2018-12-09