السبت 2/12/1443 هـ الموافق 02/07/2022 م الساعه (القدس) (غرينتش)
المجهــــول .....محمود احمد رمضان

إن كنت الجرح الساكن فى ضلوعى
فوت
ما خلاص إتعودت عليك
ما انا بيك عايش صابر
وانا بيك حى بموت
وان كنت الفرح المدارى فى عيونى
إعرف إنك ح تموت
قلبى لساه مكسور
وبيبعد عنه النور
ف ابعت احلامك لبلاد الاساطير
طير
وادخل حضن عرايس الشمس
دوَّب بكره فى عيون امس
عصير لولاد السكك التايهة ف وش الدنيا
واطلع فوق جبل الخوف
شوف
خــرَّج لحن من المزامير
يسمع لك إحساسى النايم فى ضلوعى
ويقوم
وتنام كل وحوش الكون
على نغمة بتعفق حلم كبير
واخرج من دايرة أيامك
عصفور
ما بيحلم غير بإدين الأرض
يُـلْــقُــطْ منها بمنقاره
و يسَــكَّــت بقليل م القمح
الجوع الساكن حزن صغاره
وبفضا واسع مفهوش صياد
يسمح له لما يحب يطير
يطير

ديوان شكل تاني
2022-05-26