الجمعة 14/1/1444 هـ الموافق 12/08/2022 م الساعه (القدس) (غرينتش)
انسان بسيط....بقلم محمود رمضان
 
 
وانا واقف سرحان في البلكونه
بتبص عليا نجوم الليل
كان وسطيهم وش ابويا
رسمه قديمة
كنت راسمها في كراستي زمان
كانت شجره بدون أوراق
نني في عيون انسان
كان لون الموج الخايف
تغرق جواه الأشواق 
########
انسان بسيط
#######
أبويا عمره ما كان نبي 
ولا كان ولي م الأوليا 
لكنه كان إنسان بسيط 
بتحبه كل الأنبيا 
كان يقوم م النوم 
يقطع عيش 
ويرمي لطيور السما 
كان يدور ع الغلابه 
اللي ما يملكوا حتي العما 
مع إنه كان محتاج
ما هو دا سر المكرمه
أبويا كان
يصنع من الطين قواعد
عمرى ما شفته علي كرسي قاعد
كان يفرش الأرض بحصير
والجبنه جنبيها الفطير
والصغير والكبير كان يعدي
يرمي علي أبويا السلام
فيرد أبويا وف عينيه
إبتسامات الكبار
وابص آلاقي ضيفه
حط ع الأرض كما يحط الحمام
ف يقول له أبويا
كل فطير / الخير كتير
والضيف يقول له
يدوم يا حج
كام مره زرت النبي
تلقاك يا حج حجيت كتير
فيقول له أبويا
والله نفسي يا ابن عمي
احج لو مره ف حياتي
بس أصارحك
في المنام زرت النبي
وحجيت كتير
 
 
              محمود احمد رمضان
          ديوان حدوتة الشط البعيد
 
 
 
2022-06-26