كل عام بيمر بينا
نحتفل بميلاد نبينا
بالعروسة و الحصان
واللى فينا لسه فينا
اللى فينا مش فى حد
اللى فينا مالهش حد
لو حتسأل فينا أيه؟
السؤال له ألف رد
اللى فينا حب ذات
كُره غيرنا فينا بات
لو فهمنا الدنيا صح
هنلاقيها خد و هات
فينا حقد وفينا غل
والنفوس معجونة ذل
السواد جوانا زاد
والبياض عَمال يقل
فينا كذب وفينا غش
فينا سحنة بألف وش
والنتانة هيه هيه
لو هتاخد ألف دُش
فينا دبح الخلق عادى
وربنا يحفظ بلادى 
الأدب بقى عملة نادرة
والإجرام شىء اعتيادى
الندالة فينا عادة
وقلة الأصل بزيادة
بنوطى العالى بإيدينا
ونعلى الواطى ياسادة
اللى فينا حاجات كتير
فى الصُغير والكبير
محتاجين تغيير حياتنا
محتاجين حبة ضمير