يما اعرفتي ايش صار
بيقولوا قصفوا غزة
بيقولوا في حصار...
يما ايش بالضبط الل صار...
لا يما ..لاقصفوا غزة.. ولا في حصار
هادي بس شوية اخبار..
كيف يما وصوت القصف للسما هدار
كيف يما وسما غزة شاغلة فيها النار..
والأرض بدل الزرع نبتت ثوار..
كيف يما
والليل طول كتير.. وطول المشوار..
مل الموت فينا.. مل الدم والدمار..
طب يما
هاتي ربطة الخبز معاكي
يمكن في يوم نلقى الأمان..
وخلي الخبر للارض..بدل الدم.. تاكلها
يمكن .. ويمكن..ويمكن..
ويخلص الليل .. ويطلع النهار..
شوفي يما..ضايل حد من اخوتي الصغار
دوري منيح يما
يمكن واحدة فيهم مكشفة
والدم وحدة عجسمها ستار..
غطيها منيح يما.. بحملها..
بالطرحة.. والابيض..
يمكن يزفوها بيوم من تحت الحجار..
اه يما.. تذكرت..
سدي باب الدار وراكي
يمكن ابويا عصوت القصف
يفيق من قبره .. ويرجع للدار..
بيكون اشتقلنا.. بدو يطمن..
حرام يما بعد موته.. يبقى محتار..
يما سمعت جارنا ابو نزار
بيقول لمراته.. بدوا يجوز نزار
وبدوا يدخل الجامعة ابنه نعمان
وريم وهنادي اجاهم عرسان
سمعتوا يما بيحكي.. بدندن وفرحان..
وبيقول الحمد لله.. ولادي بأمان
شوفي يما:
ضايل حد من ولاده بامان؟؟
شفتوا بيصرخ وبيقول:
"قل هو الله احد"
لم يعد هناك احد..
ليش يما هيك صار؟؟..
قوليلوا يما..
الفلسطيني ما الو حق يحلم
ما الو حق
يعيش \ يشكي \ يتكلم..
بعرف شفتي كتير يما
والقصص كتار.. كتار
لكن عالدرب صامدين منكمل المشوار
هلقيتي يما عرفتي ايش اللي صار
قولي وخلي العالم يعرف ايش اللي صار..
خلي العالم يعرف ايش اللي صار..
خلي العالم يعرف ايش اللي صار..
